Cynllun Bîff Integredig CFfI



Ydych chi’n ffermwr llaeth?



Oes gennych chi ddiddordeb mewn magu lloeau?



Neu efallai bod gennych ddiddordeb mewn pesgi gwartheg?



Os felly, Cynllun Bîff Integredig CFfI yw eich cyfle i ddatblygu menter cynhyrchu bwyd cynaliadwy a hyfyw

Calf Scheme


Mae amaethyddiaeth yn mynd yn fwy a mwy heriol, ac mae’r prosiect wedi cael ei sefydlu i annog ac i gefnogi aelodau CFfI i ddatblygu’r sgiliau angenrheidiol i sefydlu neu reoli a datblygu busnesau presennol. Ariennir Cynllun Bîff Integredig CFfI trwy Gronfa Amaethyddol Ewrop ar gyfer Datblygiad Gwledig: Ewrop yn Buddsoddi mewn Ardaloedd Gwledig a bydd yn gwneud defnydd o wybodaeth a phrofiad y prif randdeiliaid ac arbenigwyr eraill y diwydiant.

Er bod magu lloeau’n rhan ganolog o’r cynllun, mae’r cyfleoedd ar gyfer ffermwyr llaeth a phesgwyr yn debyg i’w gilydd. Gellir teilwra’r hyfforddiant a’r gefnogaeth sydd ar gael i bob sector o’r gadwyn gyflenwi i fodloni gofynion a dymuniadau’r unigolyn. Wedi’i lunio i ddarparu system gynaliadwy yn economaidd ac yn amgylcheddol, mae’r cynllun yn canolbwyntio ar iechyd, maeth a pherfformiad ar bob cam o fywyd y llo i sicrhau’r effeithlonrwydd gorau, lleihau costau cynhyrchu wrth ddatblygu sgiliau busnes a fydd yn addas ar gyfer unrhyw fenter ar y fferm.

Mae’r cynllun yn gyfle i aelodau CFfI fanteisio ar ganllawiau a chefnogaeth ganolog wedi’u teilwra gan arbenigwyr yn y maes ynghyd â swyddogion maes rhanbarthol. Nod y fenter hon yn y pen draw yw creu cadwyn gyflenwi gynaliadwy i gynorthwyo i gefnogi dyfodol Cymru wledig ac i greu incwm ar gyfer mudiad CFfI.

Pwy all gymryd rhan?


Mae’n rhaid bodloni’r meini prawf canlynol er mwyn gallu cymryd rhan yn y cynllun:

• Bod yn aelod o CFfI Cymru neu’n aelod cyswllt.

• Rhaid i’r aelod CFfI fod yn byw yng Nghymru, ac mae’n rhaid i’r prif ddaliad fod wedi’i leoli yng Nghymru.

• Rhaid iddynt fod rhwng 16 a 40 mlwydd oed.

• Yr aelod CFfI fydd y prif gyswllt ac yn gyfrifol am gymryd rhan yn y rhaglen ddatblygu.

Am fwy o fanylion cysylltwch â Luned Evans, Menter a Busnes: luned.evans@menterabusnes.co.uk